Тажикстанда диний партиянын жетекчилери өмүр бою эркинен ажыратылды

Тажикстанда тыюу салынган Ислам кайра жаралуу партиясынын төрагасынын орун басарлары – Саидумар Хусайни жана Мухаммадали Хайит бүгүн Жогорку Соттун чечими менен өмүр бою эркинен ажыратылды.

Диний партиянын жогорку макамдагы мүчөлөрүнө Тажикстандын мурдагы коргоо министри, генерал Абдухалим Назарзода уюштурган козголоңго тиешеси бар деген олуттуу айып дагы тагылган.

Айыптоочу 11-майдагы соттун отурумунда партиянын беш мүчөсү – Саидумар Хусайни, Мухаммадали Хайит, Киёмиддин Авазов, Абдукаххор Давлат жана Рахматуллох Раджабды өмүр бою эркинен ажыратууну сурады.

Прокурор башка айыпталуучуларды 16дан 30 жылга чейин түрмөгө кесүүнү, алардын арасындагы жалгыз аял – юрист Зарафо Рахмонини гана беш жылга эркинен ажыратууну сураган.

Жыйынтыгында Жогорку Сот Ислам кайра жаралуу партиясынын жетекчилерин күнөөлүү деп тапты. Өмүр бою эркинен ажыратуудан тышкары эң жогорку абак мөөнөтү 28, эң төмөнкүсү – 2 жылды түздү.

Айыпталуучулар акыркы сөзүндө күнөөлүү эместиктерин айтып, соттун адилетүү өкүм чыгаруусун сурашты.

Ой-пикир жок

Жооп калтыруу

Сиздин электрондук почтаңыз жарыяланбайт. Милдеттүү талаалар белгиленген *